Mueti

mir hei ghoffet
mir hei banget
mir hei organisiert u versuecht ds erliechtere
mir hei glachet u si go spaziere
mir hei gredt vo früecher, vom Stärbe, vo schöne u schwirige Zyte im Läbe
mir hei Angscht gha vor ere länge Liidenszyt
mir si froh gsii, dass ds Mueti rächt zfride u schmärzfrei isch gsii
mir si aui zäme go Zmorge ässe letscht Sunntig
mir hei geschter am Nami no zäme e feini Glace gässe

hütt am Morge isch ds Mueti nümm erwachet

sis Härz het scho nümm gschlage, wo d'Sibylle u ig si uf Hueb cho

es het ganz fridlech usgseh

I bi sehr fescht truurig. Obwou mir aui scho lang hei gwüsst, dass ds Mueti mues ga, isches jitz so schnäu gange. U grad für das bini o dankbar. Ds Mueti isch bis geschter am Aabe rächt säubständig u zfride gsii. Es het, i hoffes ämu, ohni gross ds liide chönne ga.



I möcht öich aune danke für öii liebe Kommentär, Mails, SMS, Iiladige, Telefon. I has lang nid gschafft, aune e Antwort ds gä. Aber ds wüsse, dass dir a mi dänket, het mir ghulfe.